РУСКИ КЕРЕСТУР – Всоботу, 26. децембра, Други дзень Рождества Христового вирни у Руским Керестуре преславели на трох Службох Божих, на хторих ше шпивало коляди, а вечар у Доме култури отримани традицийни Крачунски концерт.
На Концерту коляди интерпретовали вецей секциї Дому култури – Дзецински хор „Шкорванчки”, Дзивоцка шпивацка ґрупа з провадзеньом оркестру, Хлопска шпивацка ґрупа и Мишани хор Дому култури и церкви св. оца Миколая.
Наступела и рецитаторка Минеа Югас, як и виронаучна ґрупа дзецох, хторих пририхтали шестри служебнїци.
Шицким присутним на Концерту на Крачун повинчовал керестурски парох о. Михайло Малацко, а здогаднул и же на Перши дзень Крачуна владика отворел и Святи рок – Рок милосердия.
Крачунски концерт орґанизовал Дом култури, а програму пририхтали дириґентка, професорка Лидия Пашо, музични руководитель Юлиян Рамач Чамо, шестри служебнїци и руководителька Рецитаторскей секциї Ивана Дудаш, а конферансу водзел Себастиян Надь.
