КУЛА – По 5. април тирва конкурс за финансованє порядних змагательних активносцох спортских орґанизацийох у кулскей општини у 205. року, хтори 27. марца розписал предсидатель Општини Кула Драґан Трифунович. У буджету Општини за тоту намену опредзелєни вєдно 12 милиони динари.
Средства наменєни за финансованє трошкох превозу спортистох на урядово змаганя, за дньовнїци за службени особи, членарини и котизацию у спорских союзох, за лиценцованє и членарину за спортистох и тренерох, за трошки лїкарских препатрункох, осиґураня спортистох и спортских роботнїкох и за кнїжковидительни услуги у тей обласци.
Медзитим, єден з критериюмох же учашнїки на конкурсу у цалосци оправдали средства достати з општинского буджету у другей половки прешлого рока, як и же нєпотрошени средства за исти час, од юлия по децембер 2014. достати з буджету на основи подписаного контракту – врацели пред законченьом терашнього конкурсу.
Наглашене же тоти два критериюми барз важни, бо Комисия за розпатранє звитох и наменским трошеню средствох за порядне финансованє спортских клубох утвердзела же достати средства у цалосци нє оправдали 9 клуби з местох општини, медзи нїма и два керестурски – Здруженє спортских рибарох „Коляк” и Боди-билдинґ и фитнес клуб „Билдер Бачо”. Тоти клуби нє годни участвовац на терашнїм конкурсу.
Тиж констатоване же 6 клуби средства нє потрошели у цалосци, и кед по 5. април враца нєпотрошене на рахунок буджету, годни конкуровац на конкурс за доставанє пенєжу у тим року. Медзи нїма и Конїцки клуб „Русин” з Керестура, за хтори утвердзене же би мал врациц 5 239 динари.
Условия конкурсу и формулари за прияву на ньго мож вжац з веб-сайту Општини – www.kula.rs – а прияви по 5. април треба придац особнє на писанрнїцу Општини Кула.