НОВИ САД – Шветови молитвови дзень, з Исусовима словами як мотом „Чи знаце цо сом вам зробел”, вчера означени и у Новим Садзе, у Францизканским манастире св. Ивана Капистрана. Попри хору младих церкви св. Ивана Капистрана, на рижних язикох участвовали представителє Римокатолїцкей Церкви, Реформатскей християнскей, Еванґелистично-методистичней, Словацко-лутеранскей АВ и Грекокатолїцкей Церкви.
Вєдно зоз священїками з других вирских заєднїцох, присутних благословел и священїк др Роман Миз, а од женох грекокатолїкох бешедовали Злата Надь, Блаженка Хома Цветкович и Мария Гудак.
У пригодней програми представени Багами и слайди и активносци женох з тей жеми. През драмски слички указане и символичне умиванє ногох учашнїцом, по прикладзе Исуса Христа у шведоченю любови.
На концу, после добре орґанизованей програми, шицки присутни поволани на аґапе и ошвиженє у просторийох манастиру Ивана Капистрана.
