РУСКИ КЕРЕСТУР – Вчера у Руским Керестуре преробел хлороґен, цо за гражданох значи же буду пиц воду стабилнєйшей концентрациї, у хторей нє будзе бактериї и дзе ше нє буду стваряц канцероґени єдинєня, як цо бул случай дотераз.
– То построєнє за електролизну продукцию мишаного дезинфектанту натриюм- гипохлориду и хлордиоксиду. Служи за продукцию тей розпущенїни солї на жридлу водоводу и автоматске дозированє до цивох по резидуалу. У одношеню на стару систему хлорованя, тераз тота мишанїна при хлорованю води нє твори трихлорметани, хтори канцероґени. Медзитим, ви у води ище вше маце арсен, прецо забранєне хаснованє води, та вам прето потребна фабрика води – потолковал Милош Томишич, шеф отримованя у фабрики „Сиґма” з Червинки, хтора направела построєнє.
Ношитель тей инвестициї, вредней вецей як 13 милиони динари, Явне комуналне подприємство (ЯКП) „Руском”. За ню з Покраїнского секретарияту за польопривреду, водопривреду и лєсарство обезпечени 10 милиони 536 000 динари, Општина Кула видвоєла 2 милиони 534 000 динари, а ЯКП „Руском” виплацел ПДВ, цо коло 2,6 милиони динари.
Як за Рутенпрес гварел директор „Рускому” Иґор Фейди, перши рок отримованє построєня будзе безплатне, а потим тоту обовязку будзе плациц „Руском”.