РУСКИ КЕРЕСТУР – Керестурска парохия св. оца Миколая вчера преславела Квитну нєдзелю, а на богослуженьох було вельо вирних, окреме на Дзецинскей Служби Божей на пол дванастей, пред хтору була и споведз за младих.
Рано, на Утринї, священїк пошвецел багнїтки хтори вирни брали на штирох Службох Божих и однєсц до своїх домох.
– На Квитну нєдзелю вирни ше здогадую триюмфланого Христового приходу до Єрусалиму, кед го маса людзох дочекала з палмами. Най тота радосц приходу Христа будзе наш вибор того Христа котри полни любови и идзе на криж же би нам дал шведоченє любови, же би и ми були любов – наглашел парох о. Михайло Малацко у своєй казанї.
Дотерашнї капелан о. Иґор Вовк ше на вчерайших богослуженьох одпитал од парохиянох, подзековал и їм и парохови на госципримстве и шведоченю на хтори ше будзе спатрац.
Парох о. Михайло Малацко подзековал о. Вовкови на його душпастирскей роботи и пожадал му успиху на нововербаскей парохиї, дзе будзе парох.