РУСКИ КЕРЕСТУР – Од нєшка, та по 7. октобер, Дзецински тидзень з мотом „Бриґи нє водзиме, бавиц ше любиме!” будзе означени и у двох рукокерестурских воспитно-образовних установох – у Основней и штреднєй школи з домом школярох „Петро Кузмяк” и у дзецинскей заградки „Цицибан” ПУ „Бамби” з Кули.
У Школи „Петро Кузмяк” за Дзецински тидзень рижни активносци и змисти пририхтани у трох возросних ґрупох – за школярох нїзших класох ОШ, школярох висших класох и штредньошколцох и интернатянох. Подобно и у дзецинскей заградки „Цицибан”, дзе програми обдумани и прилагодзени шицким воспитним ґрупом.
Попри преглїбйованя теми о дзецинских правох, у Школи будзе гуманитарна акция, рижни роботнї, квизи и дружтвени бависка, спортски змаганя и єшеньски крос. За матурантох будзе орґанизоване и мотивацийне преподаванє о добродзечним даваню креви, а о тидзень и сама ация даваня креви.
И за дзеци у „Цицибану” виховательки обдумали подобн активносци – од креативних, музичних по спортски змаганя и бависка, у зависносци од возросту дзецох у цалодньових и полудньових воспитних ґрупох.