РУСКИ КЕРЕСТУР – Проєкт Фаховей пракси хтори Штредня школя „Петро Кузмякˮ з Руского Керестура, витворела у рамкох европского проєкту Еразмус +, 15. октобра презентовани занятим. Презентация проєкту окончена з нагоди Еразмус + дньох хтори ше означую од 14. по 16. октобер.
Школа за 16 школярох туристично-готелиєрского технїчара, од 26. септембра по 10. октобер реализовала двотижньову фахову праксу у Греческей у Солуну, за хтору школяре достаню Европас як потвередзенє же окончели праксу у Европи а тиж достаню и CV у европским формату котри им помогнє у пренаходзеню роботи.
Проєкт перше представела о. д. директора Школи Наталия Будински, єй заменїца Лїляна Фина, а потим и професорки фахових предметох котри були зоз школярами на пракси у Греческей, а то Єлена Миркович и Бояна Милянич, алє и други їх колеґинї котри участвовали у пририхтованю и реализованю того зложеного проєкту.
Презентация проєкту и обовязка Школи, та будзе витворена и у других зродних школох, и професором и школяром, як и домашнїм школяром, а з цильом же би ше уключели до даяких будуцих проєктох.
По словох директорки Будинсковей, у Школи ше интензивно роби на ище даскельо проєктох зоз хторима ше тиж будзе конкуровац до европскей програми Еразмус +.