ҐОСПОДЇНЦИ – После 20 рокох порядного орґанизованя пестованя руского язика у Основней школи (ОШ) „Жарко Зренянин” у Ґосподїнцох, у тим школским року, и попри достаточного числа школярох, пестованє руского язика з елементами националней култури виостало.
По словох предсидателя Управного одбору Дружтва за руски язик, литературу и културу Владимира Салонския з Ґосподїнцох, на пестованє руского язика уписани 15 школяре, нє лєм Руснацох, алє и припаднїки других националних заєднїцох з валалу, медзитим, настава ище нє почала пре одредзени проблеми у ОШ, так же вимоги за пестованє руского язика нє послати на час. Як за РТВ гварел Салонски, дума же тераз до компетентних орґанох уж послати вимоги за тот рок, а почали пририхтованя и за уводзенє пестованя руского язика за идуци школски рок.
У Ґосподїнцох число Руснацох з рока на рок вше менше, а асимилованє и даскельо ґенерациї мишаних малженствох причина же Руснаци у Ґосподїнцох вше ридше бешедую на своїм мацеринским язику. Же би го цалком нє забули, Дружтво за руски язик, литературу и културу од 1995. року орґанизовало пестованє руского язика у ОШ „Жарко Зренянин”.
Порядна настава на руским язику од першей по штварту класу у Ґосподїнцох була организована од 1945. по 1957. рок, а од теди, по 1995. рок, на даскельо заводи пробоване орґанизовац пестованє язика, хторе у континуитету зажило аж од преслави 250-рочнїци приселєня Руснацох на тоти простори.