Фахови сход о сербским як нємацеринским язику

автор зам
1.1k Опатрене

РУСКИ КЕРЕСТУР – Завод за вреднованє квалитету образованя и воспитаня и Мисия ОЕБС-у у Сербиї, а у сотруднїцтве з Националним совитом (НС) Руснацох, вчера у просторийох Дому култури у Руским Керестуре орґанизовала фахови сход з тему  „Предлог стандардох досцигнуцох за сербски як нємацерински язик и осиґуранє квалитету образованя националних меншинох у Републики Сербиї”.

4-Prepodavanje-02

На фаховим сходзе присуствовали наставнїки сербского язика з наших школох у Руским Керестуре, Коцуре и Дюрдьове, наставнїки руского язика у тих школох, члени Одбору за образованє НС Руснацох, на чолє з його предсидательку Меланию Римар, як и директоре школох – Хелена Пашо Павлович керестурскей, Славица Байор коцурскей и Мария Тртич дюрдьовскей. Преподаванє слухала и наставнїца сербского язика у Лалитю.

4-Prepodavanje-03

О вецей темох вязаних за назву сходу, медзи нїма и о резултатох руских школярох на концу основношколского и штредньошколского образованя зоз сербского як нємацеринского язика, присутним бешедовали Весна Катрал, Єлена Неделькович и Ката Симич Мишич зоз Заводу за вреднованє квалитету образованя и воспитаня, др Весна Країшник з беоґрадского Филолоґийного факултету, як членїца Роботней ґрупи за виробок спомнутих стандардох, та представителька Мисиї ОЕБС-у у Сербиї Милица Родич.

Розправа и предкладаня наставнїкох сербского язика и у школох з руским наставним язиком буду похасновани за виробок стандардох за тот предмет, а пре унапредзенє образованя школярох котри ше школую на своїм мацеринским язику.

4-Prepodavanje-04

ПОВЯЗАНИ ТЕКСТИ