РУСКИ КЕРЕСТУР/КОЦУР//ШИД – У Руским Керестуре нєшка, 15. юлия, Фолклорни ансамбл „Кечера” з Якубянох, зоз Словацкей, отрима цаловечарши концерт, а на нєдзелю и у Шидзе.
Нєшкайши концерт госцох зоз Словацкей у Керестуре будзе на 20,30 годзин у Велькей сали Дому култури.
Концерт у Шидзе, на нєдзелю, 17. юлия, будзе у порти Руского двору у Шидзе на 20 годзин, а у случаю нєвигодней хвилї у Руским доме, у просторийох КПД „Дюра Киш”. Пред концертом у Шидзе, госци з Якубянох нащивя Бикич.
Уход на обидва концерти, и у Керестуре и у Шидзе – безплатни.
Фолклорни ансамбл „Кечера” госц Фестивалу „Коцурска жатва”, на хторим у Коцуре наступя на ютре, 16. юлия, на главней, фестивалскей програми.
Ансамбл „Кечера” основани 1962. року при тедишнєй Основней школи у русинским валалє Якубяни и насампредз пестує обичаї и традицию своїх предкох з того валалу. Нєшка дзецински и ансамбл старших ма коло 85 членох, а за 54 роки роботи участвовал на велїх фестивалох и змаганьох у Словацкей, алє и поза гранїцу – у Ческей, Польскей, України, у бувшей Югославиї, аж и у Америки.
Ансамбл „Кечера” 2009. року достал и державну награду Словацкей за пестованє старих обичайох и традицийох.