ЖАБЕЛЬ – У централизованей ковид-амбуланти Дома здравя Жабель ше ище вше звекшує, и то вше интензивнєйше, число препатрункох, тестираних и новозаражених особох зоз коронавирусом, а у прешлим тижню дньово препатрани помедзи шейдзешат и сто пациєнти.
Спрам евиденциї Институту за явне здравє Войводини, вєдно з нєдзелю 21. марцом у жабельскей општини було 184 активни случаї инфекциї. Потераз, а од початку пандемиї, у општини Жабель зазначени 1.914 случаї инфекциї.
Централизована ковидамбуланта Дома здравя Жабель роби од седем рано до седемнац годзин пополадню, всоботу и внєдзелю од седем рано по штернац годзин пополадню. Находзи ше у дворе Дома здравя у Жаблю, контакт телефон 064/805-72-36, дзе мож достац совит або вецей информациї кед слово о вирусу Ковид-19.
с. саламун