Цалодньово зашеданє

автор влдї
764 Опатрене

ШИД – Понеже на 33. схадзки Скупштини општини (СО) Шид бул обсяжни дньови шор, схадзка тирвала цали дзень. СО перше потвердзела одборнїцки мандати Срдянови Малешевичови зоз Сербскей напредней странки (СНС) и Бобанови Коларовичови зоз Сосиялдемократскей странки (СДС), а вигласани и Локални акцийни план за унапредзованє положеня вибеженцох, интерно розселєних и особох котри ше врацаю по основи реадмисиї од 2015. по 2019. рок.

На СО прилапени звити о роботи Явного подприємства за будовательну жем и квартельни услуги, ЯКП „Водовод”, з планом роботи за тот рок, та ЯКП „Стандард”, Заводу за урбанизем, „Радио Шиду”, Туристичней орґанизациї, Установи за физичну културу „Партизан” и Предшколскей установи „Єлица Станивукович-Шиля”.

Одборнїки принєсли и одлуки о пременкох дзепоєдних членох у надпатраюцих одборох явних подприємствох.

Найвецей уваги виволала точка о вименки и дополнєню Одлуки о плацох и надополнєньох општинским функционером, з хтору утвердзене же предсидателька СО Наташа Цвєткович будзе доставац 90 одсто плаци одредзеней за тоту функцию, понеже є нє занята у Општини, алє у Националней служби за обезпечованє роботи.

Порушана и инициятива же би ше урґировало до „Сербия драгох” и „Желєзнїцох Сербиї” же би тоти подприємства санировали гайзибански преход од Шиду спрам Адашевцох, хтори руйновани и очежани за преход превозкох.

На предлог предсидателя Општинскей ради Николи Васича, з дньового шору зняти точки о пременкох у Општинскей виберанковей комисиї и менованю єй нових членох, а прилапена инициятива Месней заєднїци Батровци о запровадзованю нового месного самодоприносу од 1. януара 2016 року.

СО вчера принєсла и Заключенє о запровадзованю поступку за виробок пречисценого тексту Статуту Општини и Дїловнїку Скупштини општини.

7-Sid-02

ПОВЯЗАНИ ТЕКСТИ