ВЕРБАС – Вчера у просторийох вербаского КПД „Карпати” отримана закончуюца, евалуацийна схадзка Орґанизацийного одбору за Централну преславу Националного швета Руснацох и шицки члени Одбору маю лєм позитивни упечатки, понеже шицко цо було догварене и випочитоване, а Вербас на тот дзень окреме бул „живи”. Преслава була барз добре нащивена, визначене и же високи госци з державних, покраїнских и локалних орґанох, та представителє амбасадох и други визначни госци, дзивли ранґ тей преслави.
Спомнуте же шицки подїї, нє лєм Шветочна академия, були барз добре нащивени и же у Вербаше „дзвигнута палїца” преслави. За добру орґанизацию Вербащанє, Орґанизацийни одбор, Завод за културу войводянских Руснацох, Национални совит Руснацох, локална самоуправа Вербасу и Дружтво „Карпати” з рижних инстанцох достали похвали, а на схадзки спомнутим, односно шицким учашнїком у орґанизациї преслави, виражене подзекованє.
Подзекованє дате и шицким медийом, бо свой анґажман поробели на найвисшим професийним уровню.
Попри похвалох, на схадзки винєшени и дзепоєдни замеркованя, углавним на простор дзе отримана Шветочна академия, бо даєдни госци нє мали места за шедзенє, насампред котри нє потвердзели свой приход. Ґу тому, мали и нєвигоди простор за бину виводзачом очежовал пририхтованє и виходзенє на сцену.