Циль роботи злєпшованє квалитету настави

автор маф
1.2k Опатрене

РУСКИ КЕРЕСТУР – Школски одбор (ШО) Основней и штреднєй школи з домом школярох „Петро Кузмяк” на схадзки стреду, 14. септембра, єдногласно прилапел звити о роботи Школи у вецей обласцох за прешли и плани за нови школски рок, як и звит о роботи директора.

На схадзки ШО перши раз присуствовали и тройо нови члени, котрих до Одбору нєдавно меновала локална самоуправа, а предложел их Национални совит Руснацох.

Як у звитох визначели педаґоґинї Школи Мария Шанта и Любица Няради, рочни розвойни план цалком витворени, а по нїм у Школи було числени активносци зоз школярами. У рочним звиту о фаховим усовершованю наставнїкох окреме похвалєни Актив учительох, як приклад добрей пракси, а як гварене, єст наставнїкох котри на тим полю нє сполнєли обчековане.

У звиту о своєй роботи у прешлим року директорка Хелена Пашо Павлович як єден зоз значних успихох визначела найлєпши уписни резултат до керестурскей Штреднєй школи спомедзи шицких школох у кулскей општини, дзе була и на чолє тиму хтори за тото добре поробел маркетинґ.

У розвойним планє за нови школски рок визначени нови виборни предмети – рисованє, мальованє и скулпторство у ОШ, окремни форми туризму у Штреднєй школи, як и нова секция – калиґрафия у ОШ. Обновена и активносц у Униї УНЕСКО- клубох Сербиї, а як основни циль у шицких документох визначене злєпшованє квалитету настави.

Членох ШО спред локалней самоуправи интересовало чи Школа пребера даяки активносци за процес катеґоризованя Дому школярох цо, по їх думаню, нєобходне же би ше подзвигло квалитет змесценя. Понеже за тото потребни барз вельки пенєжни укладаня, директорка Школи визначела же ше на тим будзе робиц док ше здобуду условия. Заключене же за тоту намену потребне виробиц окремни, векши проєкт, пре  конкурованє за средства.

ПОВЯЗАНИ ТЕКСТИ