ШИД – Зоз Шветочну схадзку Општинского одбору Союзу здруженьох борцох Народноошлєбодительней войни Општини Шид вчера означени 9. май – Дзень побиди над фашизмом.
После привитних словох предсидателя спомнутого здруженя Саву Рошича, присутним бешедовал професор Душан Лукич, котри здогаднул на страхоти Другей шветовей войни и фашизму, як зла хторе у швеце знїщело на дзешатки милиони людзох, а на просторе Югославиї 1,7 милиони жительох.
З пригоднима стихами на програми участвовали поетове Светислав Ненадович зоз Шиду и Дьордє Янятович з Моровичу, а потим представена фото-моноґрафия спомин–памятнїкох на подручу Шидскей општини.
На шветочносци Дружтво сербско-русийского приятельства зоз Шиду преглашело найлєпших школярох котри участвовали на литературним конкурсу на сербским и русийским язику на штири теми – думки познатих странских и домашнїх поетох, и наградзени су з кнїжками.
По схадзки делеґация борецкей орґанизациї и Одряду горякох „Лазар Бибич” зоз Шиду положели квеце на спомин-костурнїцу погинутим борцом на городским теметове.
