Мина, Матия и Уна нє лєм же уча руски язик як виборни предмет, алє ше змагали и у рецитоваю, одлични су школяре, спортисти, музичаре и танцоше.
Гоч роками у Шидзе проблем як позберац дзеци хтори буду пестовац руски язик з елементами националней култури як виборного предмету, зоз хторим ше наставнїца Златка Сивч Здравич роками зочує, єст и добри приклади. Дахто, кому руски нє мацерински язик, сце го научиц и буц активни и звонка порядних школских активносцох. Таки приклад шестри и брат Шереметово з Основней школи „Бранко Радичевич”, зоз Шиду, Мина, школярка осмей класи, Матия зоз шестей и Уна, школярка зоз першей класи.
На спомнутих школярох увагу нєдавно прицагнул наступ на општинскей смотри рецитаторох „Поето, народу майого” на хторей наступели шицки тройо и рецитовали по руски. Руснацох представял ище лєм єден руски школяр зоз Бачинцох Божидар Загорянски. Правда, нє пласовали ше за висши уровень змаганя, алє Матия достал похвалу селектора смотри, а влонї була похвалєна Мина. И наймладша Уна „пребила ляд” и вона ше перши раз змагала.
– Кед зме чули же ше у школи може вибрац руски язик як виборни предмет, ми ше опредзелєли за тоти годзини и нє патрели зме чи там єст досц школярох чи нє. Сцели зме научиц и тот язик. Шмело зме прилапели предкладанє нашей наставнїци Златки же бизме ше порихтали и на змаганє у рецитованю. Найзначнєйше же бизме порозумели писню, а вец ше лєгчейше научи и интерпретує – гваря нам Мина и Матия, по чиїх крочайох рушела и наймладша шестра Уна.
Їх труд на годзинох препознала наставнїца Златка и прето их и порихтала за змаганє. Влонї Мина була похвалєна за рецитованє, а того року Матия достал и кнїжку. Шереметово нам гваря же годзини по руски за нїх нє вельке обтехованє, гоч уж маю надосц школски и звонка школски активносоци. Мина нам гвари же посилала свойо литературни и подобово роботи до „Заградки” и же достала награду за порядне сотруднїцтво. Прешли рок Мини и Матийови останє у паметаню и же були на Лєтнєй школи руского язика у Попраду у Словацкей Републики.
– Було нам крашнє под час школского одпочивку єден тидзень пребувац у иножемстве. Там зме ше дружели зоз парняками и то нам була награда за нашо активносци през рок – скромно гваря Мина и Матия.
Мина активна на змаганьох зоз биолоґиї, ґеоґрафиї, сербского язика, як и зоз физики. Ґу тому Мина и пията класа у Музичней школи „Филип Вишнїч” у Шидзе и ґрає на флаути.
– На републичним змаганю у Валєве сом достала трецу награду, а у Беоґрадзе першу, так же сом прешлого року достала „Святосавску повелю”, хтору влонї достал и мой оцец Томислав, як просвитни роботнїк. Того року сом достала ознова „Святосавску повелю”, алє тераз за вкупни мойо резултати у школи и на змаганьох. Мам часу и за спорт. Тренирам одбойку, а наступам и у ориєнтиринґ спорту за єден клуб у Новим Садзе дзе и Матия – приповеда Мина и додава же танцує у ГКУД „Шид”.
Матия у ориєнтиринґу од дзевятого року и потераз достал числени припознаня на рижних змаганьох у Сербиї.
– На тоти змаганя часто приходза и странски змагателє и вец конкуренция ище моцнєйша. Добре знам анґлийски язик и нє було ми препреченє бешедовац на змаганьох дзе сом на єден завод упознал и змагателя зоз Китаю. Попри спорта любим грац и на тамбурки, та граєм у ГКУД „Шид” и у Городским тамбуровим оркестру – гвари Матия.
Їх шестра Уна тераз школярка першей класи основней школи и вона помали руша по крочайох старшей шестри и брата. Шицки тройо одлични школяре и вшелїяк су за приклад.