Шестри Служебнїци НДМ означели дзень провинциї св. Осифа

автор маф
973 Опатрене

РУСКИ КЕРЕСТУР – У провинцийним доме у Руским Керестуре шестри Служебнїци Непорочней дїви Мариї вчера означели дзень своєй провинциї – св. Осифа, а вецей шестри означели и особни ювилеї свойого монашского живота. Дзень провинциї бул источашнє и законченє духовних вежбох за шестри, хтори тирвали од 13. марца.

З тих нагодох вчера була Благодарна Служба Божа у Лурдескей каплїци шестрох Служебнїцох, а служели о. Мартин Габурски з України, котри водзел и духовни вежби за шестри, та кулски священїки о. Виталий Лотоцки и о. Платон Салак, шицки монахи василиянє.

На Служби 50 роки монашского живота означели ш. Терезка Сопка и ш. София Костюк, 60 роки ш. Мария Дерка, Гавриїла Гребачук и Ксения Суботнїцки, док 91-рочна ш. Катарина Копчански, родом з Коцура, преславела 75-рочни ювилей, яки ище нє зазначени у историї тей провинциї – дознава „Рутенпрес” од настоятельки провинцийного дому, ш. Мариї Пелих.

13-Sestri-02

Попри провинцийней шестри Вероники Гралюк, на вчерайшей шветочносци, як и на духовних вежбох, були присутни скоро шицки шестри з манастирох хтори спадаю до провинциї св. Осифа, а то пейц манастири у Сербиї, три у України и єден у Баня Луки, у Републики Сербскей. Присуствовали и шестри з тей провинциї котри робя у Минхену, у Нємецкей и у Риме, у Италиї.

У мено мати ґенералней з Ґенералного дому Шестрох Служебнїцох у Риме, на шицких подїйох присуствовала и єдна з єй совитнїцох, ш. Юлия Бойчук, котра з нашей провинциї.

 

ПОВЯЗАНИ ТЕКСТИ