РУСКИ КЕРЕСТУР – Нови школски рок вчера почал и у Основней и штреднєй школи з домом школярох „Петро Кузмяк” и у керестурским оддзелєню „Цицибан” ПУ „Бамби” зоз Кули. У першей класи oсновней школи єст 37 школярох, a у предшколскей ґрупи у „Цицибану” того року уписани 55-еро дзеци, та и єдних и других вецей як прешлого року.
У Школи у тим року вєдно будзе 521 школяр, а за руске оддзелєнє Ґимназиї на тот завод специфичне винїмково вельке число – 22 школярe. У Доме школярох уписани 60, а капацитет интернату 80 места.
У цалим „Цицибану” того року тиж єст вецей дзеци як влонї, бо вєдно у предшколским и цалодньовим пребуваню уписани 140 дзеци.
Наймладших школярох 31. авґуста привитала директорка Школи Хелена Пашо Павлович, а вчера їх нащивели и представительки локалней самоуправи – предсидателька СО Кула Снежана Мркаїч и представительки Канцелариї за младих.
Як уж традиция вецей роки, вони им з нагоди початка школованя подаровали Транспортни буквар, лайбик и наруквицу. Як наглашела предсидателька Мркаїчова, тоти дарунки им помогню за безпечнєйше справованє у транспорту.