КУЛА/КОЦУР/ШИД – За школяра ґенерациї у ОШ „Петефи бриґада” у Кули преглашена Сара Мармила, у ОШ „Братство-єдинство” у Коцуре Марко Буила, а у ОШ „Бранко Радичевич” у Шидзе Мина Шеремет.
Сара Мармила з Кули, попри Вуковей дипломи, од трецей класи посциговала значни резултати на змаганьох – од општинского по републични уровень, найвецей з математики, физики, хемиї, биолоґиї, технїчного и информатичного образованя и подобовей култури, а од пиятей класи и з руского язика. Успишна була и у кошарки, ґлумела и у театралних представох Руского КУД „Гавриїл Костельник”, активни є член и кулского КУД „Сербия”.
Марко Буила з Коцура, попри одличного ученя, указал свойо схопносци и у язикох, та бул успишни на змаганьох з руского и сербского язика як нємацеринского, наградзена му и литературна робота на Фестивалє кирилскей писменосци. Закончел и шейсц класи Музичней школи на гушлї, а активни є член КУД „Жатва”, дзе танцує и шпива.
Мина Шеремет зоз Шиду, окрем Вуковей дипломи, власнїца и велїх дипломох на змаганьох з математики, ґеоґрафиї, физики, биолоґиї, сербского, алє и руского язика, хтори активно виучовала гоч є нє Рускиня. Барз була активна и у хорскей и драмскей секциї Школи, алє и у драмскей секциї у КУД „Дюра Киш”, та танєчней у ГКУД „Шид”. Закончела и пейц класи Музичней школи на флаути, на хторей тиж була успишна на змаганьох, за цо достала „Святосавску грамоту”. Тиж є активна и на спортских теренох у одбойки и ориєнтиринґ спорту.