Младша шпивацка ґрупа КПД „Дюра Киш” зоз Шиду основана 2008. року и такой ше почала визначовац зоз квалитетом. Наступали на числених манифестацийох, смотрох и змаганьох, а у новембру 2014. року почали участвовац у змагательней телевизийней емисиї „Шлївик” хтора ше емитує на РТС. Емисия пестує жридлове шпиванє и народну традицию, а Шидянє ше у априлу 2015. року пласовали до штварцини финала.
Окрем фолклору, у КПД „Дюра Киш” у Шидзе ше вше пестовало и шпиванє. Поряднє ше отримовало проби, а руска шпиванка вше мала значне место. Гоч наступали солисти, гоч шпивацки ґрупи, програми нє могли прейсц без рускей шпиванки. Так 2008. року оформена Дзивоцка шпивацка група хтору теди творели Наташа Цирба (тераз Варґа), Таня Надь (тераз Орещанин), и ище дзепоєдни дзивки, а 2011. року ґу нїм ше придружела и Наташа Еделински Миколка.
– З початку було осем дзивки у ґрупи, хтору пририхтовал Юлиян Рамач Чамо. Наступали зме на рижних манифестацийох, як и на фестивалє „Най ше нє забудзе”. Єден час после Юлияна Рамача з ґрупу робел Йован Маркович. Познєйше Михаел Ґовля и я превжали тоту обовязку. З оглядом на тото же сом даскельо роки грала на клавиру, нє було ми чежко анґажовац ше, а мала сом и вельку помоц од Михаела хтори грає на ґитари. Почали зме вежбац шпиванє з провадзеньом гармоники або ґитари, а тиж и шпиванє „а капела” – приповеда Наташа Еделински Миколка.
ЗАМЕРКОВАЛИ ИХ И ФАХОВЦИ
Нє було програми у Дружтве, а анї ширше, дзе нє наступала Дзивоцка шпивацка ґрупа. З часом ше до ґрупи почали уключовац и леґинє, та ґрупа постава Младша мишана шпивацка ґрупа. Предлужели вредно робиц, наступали на велїх наших фестивалох, на означованю националного швета Руснацох, „Шидским културним лєту”, госцовали на програмох других културно-уметнїцких дружтвох, участвовали и на рижних змаганьох, а прешлого року, вєдно зоз танєчнїками зоз КПД „Дюра Киш”, хтори одтанцовали два танци, участвовали на Општинскей смотри фолклорней творчосци. Представели ше зоз двома шпиванками.
– У комисиї були штверо оценьоваче хтори окреме замерковали нашо шпиванє, облєчиво, фризури, як и цалосни наступ, та вец, гоч зме були „у другим планє”, заш лєм зме прешли на зонску смотру змаганя у Печинцох, у катеґориї пестованя народней традициї. Потим зме наступели и на покраїнскей смотри у Вербаше, хтора була отримана у октобру прешлого року. За нас то бул вельки успих, бо нашу роботу замерковали фаховци – визначує Наташа Еделински Миколка.
Нови успих шлїдзел нєодлуга, понеже уж у новембру достали поволанку на кастинґ до телевизийней емисиї хтора пестує жридлове шпиванє и народну традицию „Шлївик”, а емитує ше на РТС. Кастинґ бул у Сримскей Митровици на уровню Сримского управного округу. Истого дня кед бул кастинґ, ґрупа наступала и на манифестациї з нагоди означованя „Дня борби процив цукровей хороти” у сали КОЦ (Културно-образовни центер) у Шидзе. Як прави професионалци, ґрупа на кастинґу наступела перша, а на спомнутей програми у Шидзе остатня, так же сцигли участвовац на обидвох наступох, гоч од Шиду по Сримску Митровицу єст вецей як 40 километери оддалєносци.
У ШТВАРЦИНИ ФИНАЛА
Ґрупа ше у „Шлївику” представела зоз шпиванку „Вежнї зайду” и такой прешли до осмини финала на змаганю хторе було отримане 21. фебруара 2015. року у Беоґрадзе. Прескочели и тоту змагательну ґарадичу и 1. априла ше пласовали до штварцини финала, зоз шпиванку „Явор”. Ту ше и закончело їх змаганє, понеже ше глєдало цо „жридловше” шпиванє, алє наступ у „Шлївику” бул єдно наисце вельке искуство и дожице, хторе потвердзело їх намаганє и успих.
– Вредни зме и далєй. Тераз ше ґу нам приключели и нови, млади дзивчата. Три зоз штреднєй и три зоз основней школи. Наздавам ше же и убудуце будземе крашнє шпивац и же то публика будзе препознавац, а и фахово комисиї кед ознова будземе участвовац на змаганьох.
Нє маме паузу, бо концом септембра, як и Старша мишана шпивацка ґрупа нашого Дружтва, наступиме на тогорочней покраїнскей манифестациї у Вербаше – гварела на концу Наташа Еделински Миколка.
БОГАТИ РЕПЕРТОАР
– Окрем же шпиваме руски шпиванки, на репертоаре маме и сербски народни шпиванки, понеже на одредзених наступох шпиваме и руски и сербски шпиванки. Тиж маме и єдну часц духовних шпиванкох, колядох, хтори шпиваме на одредзених пригодних програмох вочи, або по Крачунє – гвари Наташа Еделински Миколка.