РУСКИ КЕРЕСТУР – Ютрейша цалодньова роботна схадзка членох штирох одборох и представительох подручних канцеларийох (ПК) Националного совиту (НС) Руснацох з наших местох, у Руским Керестуре будзе у будинку Основней и штреднєй школи з домом школярох „Петро Кузмяк”, а нє у шедзиску НС у Замку, як скорей наявйоване.
Заєднїцки сход членох одборох и ПК НС на соботу, 29. авґуста, почнє на 10 годзин з роботу по одборох окреме – за образованє, културу, информованє и службене хаснованє язика и писма. Приношенє заключеньох на одборох плановане од 12 до 13,30 годзин, а од 15 до 16,30 годзин заєднїцка дискусия.
Циль схадзки же би ше розпатрело актуални стан и проблеми у спомнутих обласцох и предложело адекватни мири за їх розришованє.
Резултат схадзки би мало буц приношенє акцийного плану, у хторим буду назначени активносци хтори треба поробиц, ношителє каждей активносци, час за хтори их треба закончиц и рамикови финансийни план нєобходни за реализованє тих активносцох.