РУСКИ КЕРЕСТУР – Тогорочни 58. Фестивал рускей култури „Червена ружа” почина наютре у Руским Керестуре.
Наютре, 28. юния, на 17 годзин почнє 51. „Червене пупчеˮ на лєтнєй бини у дворе Школи „Петро Кузмяк”, а потим ше програма селї до Дому култури. На 21 г. у голу Дому култури будзе отворена вистава фотоґрафийох Маї Орихан, на 21,30 г. Вечар младих „Червена ружаˮ у Велькей сали Дому култури на хторим буду виведзени дзевец нумери, од чого пейц нови, а од 22 годзин, предвидзена музика за розвагу, у школским дворе.
На соботу у Спортскей гали на 8,30 годзин почнє турнир у одбойки у рамикох Спортских бавискох „Яша Баков”, а на 10 годзин будзе отворена дзевята по шоре Привредно-туристична манифестация „Керестурски саям” у Доме ремеселнїкох, котру орґанизую Здруженє ремеселнїкох и приватних поднїмательох и Здруженє женох „Байка” з Руского Керестура.
Истого дня, на 20 годзин у програми „Одгуки з ровнїни” публика годна одпатриц ревиялни наступи руских ансамблох, як и наступ госцуюцого Ансамблу танцу „Галичанки” зоз Львова з України, а на концу тиж предвидзена музика за розвагу у школским дворе..
Попри тих програмох, шицки госци буду мац нагоду нащивиц и Музейну збирку котра будзе отворена и пияток и соботу од 14 по 20 годзин.
Орґанизатор Фестивала Дом култури Руски Керестур, а софинансовали го Општина Кула, Национални совит Руснацох, Министерство култури и информованя Републики Сербиї и Покраїнски секретарият за културу, явне информованє и одношеня з вирскима заєднїцами.