ВЕРБАС – Без огляду же Явне подприємство (ЯП) за информованє „Вербас” ище раз концом юния придало комплетну документацию за процес приватизациї, з Аґенциї за приватизацию явене же за тото подприємство нє будзе розписана явна поволанка за предаванє, понеже длуство подприємства векше од оценєного капиталу.
У таких обставинох 26 роботнїки подписали социялну програму, а конєчне ришенє о тим ше чека з ресорного министерства, док 8 роботнїки програму нє подписали. Понеже на єдней з прешлотижньових схадзкох Скупштини општини Вербас прилапена одлука же ЯКП „Стандард” убудуце будзе реґистроване и за други дїялносци, вироятно же 8 роботнїки з Подприємства за информованє прейду робиц до „Стандарду”.
Нови сектор у Комуналним подприємстве будзе сектор за маркетинґ, а док ше чека на одлуку з Аґенциї о евентуалним гашеню ЯП за информованє, тото подприємство тих дньох поряднє роби по своєй лєтнєй програмскей шеми.