РУСКИ КЕРЕСТУР – У Ґимназиї „Петро Кузмяк” вчера отримана промоция Оддзелєня за русинистику Филозофского факултету з Нового Саду.
Ґимназиялцом руских оддзелєньох трецей класи и матурантом промоцию отримал асистент на Оддзелєню ма Александар Мудри, а привитала го и представела професорка руского язика у Ґимназиї Люпка Малацко.
Мудри ґимназиялцом представел кратки историят Оддзелєня хторе 1981. року преросло зоз Катедри за руски язик цо робела на факултету од 1972. року, а на Оддзелєню по нєшка дипломовали 60 студенти.
Як наглашел ма Мудри, русинистика акредитовани студиї и, попри основних штиророчних, понука и мастер студиї, а поштредно и докторски. На основних студийох понукнути пейц буджетски места и пейц софинансуюци.
Вокраци представени и студийна програма и предмети на Оддзелєню, як и можлївосци и обласци за находзенє роботи.
Як за „Рутенпрес” виявел асистент Мудри, з промоцию пробую заинтересовац младих же би ше уписали на Оддзелєнє, хторе єдина високошколска установа по руски, а дава кадри за нашо институциї, та барз важне же би вона як и потераз предлужела зоз своїм иснованьом.
– Того року бизме Оддзелєнє сцели представиц и у других наших местох, у наших КУД, бо вони збераю и младих, а того школского року то будзе ище у Дюрдьове. Любели бизме ше представиц ище у даєдним месце у Сриме, а у идуцим школским року думам же то будзе ище орґанизованша акция – заключел Мудри.