БЕРКАСОВО – Внєдзелю, на швето Святого Трифуна – защитнїка винїцох и винїцарох, отримана 26. по шоре традицийна привредно-туристична манифестация „Сримска винияда“ хтору орґанизовала Месна заєднїца Беркасово з помоцу Општини Шид и Туристичней орґанизациї Шиду.
Пре пандемую вируса корона на манифестациї було значно менєй приявених винох хтори оценьовал Слободан Шапоня, фаховец за вино зоз Шиду.
У катеґориї билих винох було 11 прикладнїки, а перше место освоєло Польопривредне ґаздовство „Сокол“ з Бикичу, друге Бранко Митович з Беркасова, а треце Милош Коїч тиж з Беркасова.
При червених винох було осем прикладнїки, перше место зважал Бранко Дошич зоз Шиду, друге Дарко Плахчински тиж зоз Шиду, а треце Джон Файфрич зоз Беркасова.
Були оценєти и штири розе вина, а перше место освоєло Польопривредне ґаздовство „Сокол“ з Бикичу, друге Саша Гаїч зоз Александровца, а треце Дарко Плахчински зоз Шиду.
По традициї ше одходзи и до винїци и пошвеца лозу, а парох з Беркасова о. Владимир Еделински Миколка пошвецел з тей нагоди винїци Мирослава Сокола и Ґорана Бобаля з Бикичу.