МИКЛОШЕВЦИ – После як у Вуковару була централна програма, и миклошевски Руснаци всоботу, 30. мая, означели Дзень Руснацох у Републики Горватскей зоз Шветочну академию, хтору у Дружтвеним доме орґанизовала Рада рускей националней меншини Општини Томповци, у сотруднїцтве з домашнїм КУД „Яким Ґовля”.
Академия почала з интонованьом державней гимни и шветочней шпиванки Руснацох „Браца Русини”, хтори, под дириґентством Ани Бучко, одшпивали Женска шпивацка ґрупа КУД „Яким Ґовля” и Хлопска ґрупа КУД „Яким Гарди” з Петровцох. У мено орґанизатора присутних привитал предсидатель Ради и заменїк началнїка Општини Томповци Мирослав Лїкар, з пригодну бешеду швето повинчовал и началнїк Општини Томислав Паненич. Як висланїк владики крижевского, кир Николи Кекича, винчованки пренєсол славонско-сримски викар и миклошевски парох о. Яким Симунович, котри пречитал и интересантни историйни факти о присельованю Руснацох на тоти простори.
У музично-поетскей часци програми стихи руских поетох – Агнетки Бучко Папгаргаї, Мирона Колошняя, Михала Ковача и Штефана Гудака пречитали Сабина Ждиняк, Иван Лїкар, Леся Мудри, Паула Поточки и Ана Бучко. Школяр 8. класи основней и 2. класи музичней основней школи Ренато Миклош на гармоники одграл два кратши композицї, а даскельо народни шпиванки виведли домашня Женска шпивацка ґрупа и Хлопска ґрупа з Петровцох.
Програму водзели Паула Поточки и Иван Лїкар, а по програми за шицких було порихтане окрипенє и друженє.
