КОЦУР – Вчера, на Вельку Матку Божу и Кирбай у Коцуре, шветочно означени и два вельки ювилеї – 250 роки грекокатолїцкей церкви у Коцуре и 100 роки приселєня часних шестрох служебнїцох до Коцура.
Архиєрейску Службу Божу предводзели беоґрадски надвладика, монс. Станислав Хочевар и апостолски еґзарх за грекокатолїкох у Сербиї, кир Георгий Джуджар, а сослужели дзешец священїки з наших парохийох.
З нагоди ювилейох, виронаучни дзеци на Служби Божей виведли кратшу пригодну програму и привитали и високих госцох – надвладику Хочевара и владику Джуджара. Шветочну атмосферу возвеличал и Хор „Розанов” з Дюрдьова, хтори шпивал Службу, як и числени парохоянє, понеже церква Успения пресвятей Богородици з тей нагоди була полна з вирнима з Коцура и других местох. На Архиєрейскей Служби Божей присуствовал и предсидатель Вивершного обору Националного совиту Руснацох Желько Ковач.
Преосвящени владика Георгий у казанї коцурским парохияном повинчовал ювилеї, окреме и ювилей часним шестром и, як наглашел, мушиме буц подзековни нашим предком котри пред 250 роками збудовали першу грекокатолїцку церкву у Коцуре, без хторей би, як гварел, нас нєшка можебуц и нє було на тих просторох.
Ювилеї вчера означени и з колективну подобову виставу з назву „Под покровом пресвятей Богородици”, хтора у Церковней сали отворена пред Архиєрейску Службу Божу. Присутних на отвераню вистави привитал предсидатель Церковного одбору коцурскей церкви др Михайло Фейса, а виставу отворел подобови уметнїк з Вербасу Владимир Няради. На вистави виложени шеснац малюнки и єден древорез, векшином на духовни теми.
Означованє 250-рочнїци грекокатолїцкей церкви у Коцуре и 100-рочнїци приселєня часних шестрох служебнїцох до Коцура нєшка, 29. августа, будзе предлужене з представяньом моноґрафиї коцурскей грекокатолїцкей церкви „Чувар вири, язика и руского народу” на 19 годзин у валалскей библиотеки, а потим на 20 годзин у велькей сали Дому култури будзе отримана Шветочна академия.
