КОЦУР – У Грекокатолїцкей церкви Успения Пресвятей Богородици стреду вечар, 18. децембра, отримане Всеночне з нагоди означованя швета Святого оца Миколая.
Всеночному присуствовали числени парохиянє, а того дня их парох коцурски о. Владислав Рац здогаднул на велькосц и доброту святого Миколая. Шпив и молитва вирних виполнєли церкву з нагоди того значного швета.
По законченю Всеночного, отримана и святочна програма на чесц святому Миколайови. Зменьовали ше шпиванки и стихи, драмски слички з хторима наймладши парохиянє коцурскей парохиї славели його доброту и шицки його добри дїла. Миколай побешедовал зоз дзецми и вєдно ше здогадли як треба же би ше справовали и були добри християнє. Програму зоз виронаучнима дзецми пририхтала вироучителька Ксения Бесерминї и Таня Мученски.
Церква того вечара була полна, а наймладших вирних з радосцу провадзели їх найблїзши и члени фамелиї. По законченю програми, святи Миколай обрадовал наймладших и подзелєл им коло 150 пакецики.
Нєшка, 19. децембра, праве на швето Святого оца Миколая у шицких Службох Божих будзе и мированє вирних.