РУСКИ КЕРЕСТУР – Руска матка (РМ), прешлей соботи 28. децембра у своїх просторийох Руска матка шветочно означела и преславела свою 34. рочнїцу од снованя зоз Виставу малюнкох зоз тогорочней VI Подобовей колониї „Еуфемия Гарди” – Руски Керестур 2024” и IX Стретнуцом поетох, литературних и музичних творительох Рускей матки.
На отвераню вистави бешедовали спред орґанизатора МО РМ РК Дюра Папуґа, и Славко Пап як и предсидатель РМ др Михайло Фейса, а нащивителє могли опатриц витвореня 16 подобових творительох з Руского Керестура и околних местох.
Потим отримане друженє на литературним Стретнуцу дзе на початку тогорочне Припознанє з меном „Юлияна Надя” уручене лауреатком поетеси Лїляна Кирда з Руского Керестура и Єлени Зарубица зоз Кули. Традицийно, их номиновали два Здруженя орґанизаторох Стретнуцох – Руска Матка и Задужбина Бори Латиновича.
Потим ше зоз своїма поетскима творами представели 18 члени Рускей матки з Керестура, авторе заступени у часопису „Ерато над Коцуром” з Коцура и члени Задужбини Бори Латиновича зоз Кули з околних местох, прецо програма була двоязична. У музичней часци участвовали гудаци зоз Коцура.
Шицки учашнїки достали и подзекованя за участвованє на Стретнуцу, а потим друженє предлужели у Ресторану „Лонґов”.
