10. ЮНИЙ – На нєшкайши дзень народзел ше поета и писатель о. Максимилиян Буїла.
1793 – У Паризу отворена перша явна зоолоґийна заграда Жарден де Плант.
1832 – Народзени нємецки инжинєр Николаус Ауґуст Ото (Холцгаузен ан дер Хайде, Нємецка, 10. юний 1832 – Келн, 26. януар 1891), хтори 1861. року направел перши бензински мотор, видумал штиротактни мотор з нукашнїм згорйованьом, познати як Ото мотор, цо оможлївело розвой автомобилох.
1904 – Народзел ше священїк, поета и писатель о. Максимилиян Буїла (Нови Вербас, 10. юний 1904 – Нови Сад, 23. новембер 1993). Школовал ше у интернату Бенедиктанцох у Фолдерсу при городу Гал, 13 километри оддалєного од Инсбруку (Тирол), закончел пейц класи ґимназиї, исусовацку ґимназию у Травнику. Студирал богословию у Заґребе и Львове .За священїка є рукоположени 1929. року у Заґребе. Як ґимназиялєц о. Максимилиян Буїла почал писац писнї, а познєйше и приповедки. Свойо твори обявйовал у Руских новинох и Руским календаре. Иницировал и орґанизовал Сновательну схадзку студентох и стредньошколцох рускей народносци, на котрей принєшена одлука о снованю Союзу руских школярох (СРШ), чиї бул перши предсидатель. Службовал у Драґох (Жумберак), Липовлянох, у Коцуре, од авґуста 1945. року водзел парохию у Новим Садзе скоро полни 23 роки. У половки юлия 1968. року о. Максимилиян Буїла ше поцагнул до пензиї. Умар у Новим Садзе, 23. новембра 1993. року.
1999 – Остатнї проєктили НАТО, 79. дня аґресиї на Союзну Републику Югославию, спадли после 13 годзин у подручу валала Кололеч при Косовскей Каменїци, а пошвидко потим ґенерални секретар НАТО Гавиєр Солана сообщел же бомбардованє престава.