НОВИ САД – Покраїнска секретарка за културу, явне информованє и одношеня з вирскима заєднїцами Александра Чирич Бошкович, вчера, 18. юния уручела контракти по конкурсу за финансованє и софинансованє проєктох зоз обласци култури и вирских заєднїцох.
Покраїнска секретарка визначела же значносц конкурсних линийох найлєпше илуструю средства хтори опредзелєни за тоту наменку у суми 813 милиони динари.
Додзельованє контрактох по конкурсох значне случованє як за тих хтори достали средства так и за Секретарият, понеже указую намаганя Покраїнскей влади же би обезпечела потребни условия за окончованє и розвой културних дїялносцох на териториї Войводини гварела секретарка Чирич Бошкович на уручованю контрактох. И додала же видвоєни средства зоз обласци култури буду вихасновани за реализацию проєктох защити и унапредзованя културного нашлїдства, култури и уметносци националних меншинох, литературней творчосци, филмскей, музичней, сценскей и визуелней уметносци, защити, реставрациї и диґитализациї архивского филмского и аудио материялу, традицийну творчосц Сербох, набавку публикацийох за библиотеки, як и за проєкти унапредзованя културней инфраструктури.
Секретар Чирич Бошкович гварела же конкурси зоз обласци култури нагода же би ше реализовало велї проєкти на рочним уровню, хтори допринєшу унапредзованю сучасней творчосци, як и очуваню и презентациї историї, традициї и култури националних заєднїцох, хтори єдна з препознатлївих прикметох Войводини.