18. НОВЕМБЕР – На нєшкайши дзень народзел ше Михайло Канюх.
9 – Народзел ше римски цар Титус Флавиус Веспасианус, снователь династиї Флавийох, хтори под час свойого владаня подзвигнул велїчезни будинки як цо то Колосеум, Капитол и Амфитеатер.
1626 – Папа Урбан Осми пошвецел церкву Святого Петра у Риме.
1786 – Народзел ше нємецки композитор Карл Мария Фридрих Ернст фон Вебер, творец нємецкей романтичней опери.
1883 – У ЗАД прилапене стандардне рахованє часу и жем подзелєна на штири часово зони.
1930 – Народзел ше просвитни роботнїк, ґлумец аматер и прекладатель Михайло Канюх (Руски Керестур, 18. новембер 1930 – Ветерник, 19. децембер 2000). Основну школу и нїзши класи ґимназиї закончел у Руским Керестуре, висши класи ґимназиї з вельку матуру закончел у Вербаше, а Висшу педаґоґийну школу у Новим Садзе. Робиц почал у школи у Коцуре, а потим бул наставнїк у Руским Керестуре, дзе бул и директор школи. Зоз фамелию ше 1966. року преселєл до Ветернику, дзе єден час робел як наставнїк и помоцнїк директора ОШ Михайло Пупин, потим робел у Прекладательней служби Скупштини АП Войводини, кед позарядово закончел и правни факултет. Михайло Канюх ше упокоєл 19. децембра 2000. року, поховани є на теметове у Ветернику.
2004 – У Анґлиї после 700 рокох традициї забранєни лови на лїшки.
2017 – У Новим Садзе першираз означени Дзень павукох.
2024 – У Руским Керестуре значени ювилеї руского образованя и писменосци: 100 роки од виходзеня Граматики бачваньско-рускей бешеди др Гавриїла Костельника, 120-рочнїца предшколского образованя у Руским Керестуре, и 270 роки образованя на руским язику.
Нєшка Европски дзень свидомосци о антибиотикох (European Antibiotic Awareness Day, EAAD). Означованє того дня почало 2008. року на предклад Европского центра за превенцию и контролу хоротох (European Centre for Disease Prevention and Control, ECDC).