СНЇНА (СЛОВАЦКА) – Прешлого викенду, 24. и 25. октобра, Мишани Хор Дому култури и Катедралней церкви св. о. Миколая з Руского Керестура госцовал у Словацкей, на 25. Фестивалє духовней писнї у Снїни.
Пред наступом на Фестивалє, всоботу вечар Хор у грекокатолїцкей церкви у валалє Пихня нєдалєко од Снїни отримал самостойни концерт духовних и руских народних шпиванкох, а внєдзелю дополадня шпивали Службу Божу у валалє Колониця. Исти дзень, 25. октобра, Керестурци наступели на Фестивалє духовней писнї у Снїни.
Попри нашого Хору зоз Сербиї, на тогорочним Фестивалє у Доме култури у Снїни участвовали дзевец хори и шпивацки групи з України и домашнєй Словацкей. Члени хору достали вельки аплауз вшадзи дзе шпивали, а Фестивал у Снїни провадзел и апостолски еґзарх за грекокатолїкох у Сербиї, владика Георгий Джуджар.
З керестурским Хором у Словацкей бул и предсидатель Вивершного одбору Националного совиту Руснацох Желько Ковач, а на поволанку Союзу Русинох-Українцох Словацкей, госцованє орґанизовал Союз Руснацох Українцох Сербиї, чия делегация, на чолє з предсидательом Боґданом Виславскийом, тиж була на Фестивалє.
Попри Снїни, члени Хору нащивели и Прешов и Кошице, а з госцованя ше врацели пондзелок вноци, 26. октобра.
