15. ДЕЦЕМБЕР – На нєшкайши дзень народзел ше Славко Загорянски.
1832 – Народзел ше инжинєр Александар Ґустав Айфел (Дижон, Французка, 15. децембер 1832 – Париз, 27. децембер 1923), будователь турнї у Паризу, хтора наволана по нїм.
1852 – Народзел ше физичар Анроан Анри Бекерел (Париз, Французка, 15. децембер 1852 – Кроазик, Французка, 25. авґуст 1908), пренаходзач радиоактивних зарйох зоз уранских зєдинєньох, добитнїк Нобеловей награди за физику 1903. року. Йому на чесц мерна єдинка за радиоактивносц наволана бекерел.
1859 – Народзел ше лїкар и филолоґ Лазар Лудвиґ Заменхоф (Бялисток, 15. децембер 1859 – Варшава, 14. април 1917), творец медзинародного язика есперанто. Перши учебнїк того язика обявел 1887 – под псевдонимом доктор Есперанто – гевтот хтори ше наздава.
1947 – Народзел ше композитор и културни дїяч Славко Загорянски (Бачинци, 15. децембер 1947 – Шид, 7. май 2018). До Основней школи ходзел у Бачинцох и Кукуєвцох, а тарґовецку школу закончел у Шидзе. Робел як тарґовец полни 40 роки и 2006. року пошол до пензиї. Знал грац на гармоники и на ґитари. Першу композицию на власни текст (Чекал сом милу) на Червену ружу послал 1972. року, по 2007. рок, кед на Червеним пупчу виведзена остатня його композиция, викомпоновал 15 композициї, од чого за три написал и тексти, а найвецей компоновал на тексти шидского наставнїка у пензиї Василя Мудрого. Бул член хору Здруженя пензионерох у Шидзе, дзе наступал и як солист и як инструменталист. Попри тим, бул и активни член КПД Дюра Киш у Шидзе и член Дружтва за руски язик, литературу и културу. Славко Загорянски поховани 8. мая 2018. року на теметове у Шидзе.
2000 – Українски предсидатель Леонид Кучма розказал заверанє нуклеарней електрарнї у Чернобилю, у хторей ше 14 роки пред тим случел найчежши инцидент у историї нуклеарних централох.
2001 – Крива турня у италиянским городзе Пиза отворена за явносц, после скоро 12 рокох компликованих роботох зоз хторима зопарте завальованє тей шветовей туристичней атракциї.