РУСКИ КЕРЕСТУР – Перши шнїг тей жими спаднул вноци медзи 2. и 3. януаром, жимска служба благочасово розчисцела шнїг зоз скоро шицких улїцох у валалє. Розчисцованє шнїгу розпочали такой рано од 4 годзин, медзитим и по нєшка остали нєрозчисцени дзепоєдни улїци, або часци улїчкох, углавним на окраїску валала.
Отримованє медзимесних драгох под инґеренцию подприємства „Бачка драги”, док за отримованє драгох по населєних местох кулскей општини задлужени комунални подприємства, односно за розчисцованє шнїгу подприємство „Мако мил” доо зоз Руского Керестура котре ма подписани контракт о спомнутих услугох.
Уж рано до 9 годзин шнїг бул розчисцени на шицких векших улїцох, медзитим нєрозчисцени остали вонконцом улїчки: Орос Ґабра, Сивч Йовґена и Янка Тота Боґмека, як и часци улїчкох Войводянских бриґадох, Народного фронта, Братох Бильня, Дюру Кишюгаса и дзепоєдни менши крижни драги.
З оглядом же 3. януар бул собота, того дня бул отримани и пияц котри тиж так бул нєрозчисцени, но як ше нам удало дознац, пиячарину того дня ше нє наплацовало.
Шнїгу ше вшелїяк найбаржей обрадовали наймладши, цо обачлїве по тим же у валалє скоро опрез каждого обисца єст направени дїдо шнїжнїк, алє и по тим же вшадзи мож видзиц дзеци на саночкох, або як ше спущую на мехох слами.
