Мено и презвиско: Сенка Русковски Надь

Як ше вола твоя професия?

Новинарка.

Зоз чим ше точно занїмаш?

Робим у Радио-телевизиї Войводини у Новим Садзе, дзе правиме телевизийни приповедки (прилоги) на рижни теми. Кед ше дацо важне случує, знїматель и я тото идземе зняц, а потим монтажер и я вєдно зоз того направиме крадки вистки, потим прилоги за ТВ Маґазин, лєбо емисиї за Добри вечар Войводино. Часто знїмам дзеци и правим емисию Дзецински швет, хтора ше емитує штварти штварток у мешацу.  

Яку школу треба закончиц же би дахто могол робиц як новинар?

Кед дахто сце робиц як новинар углавним муши мац закончени факултет, алє нє обовязне же би то було праве Оддзелєнє за медийски студиї. Єст барз добрих новинарох хтори закончели даяки други факултети, алє су талантовани за тоту роботу и роздумую так як треба же би роздумовал єден новинар. Я студирала новинарство, цо ми дало добру основу за дальше ученє тей роботи. Тоту роботу ше найлєпше учи кед ше ю роби.

Яки ше там предмети учи?

Учи ше язик, прето же ше новинар муши знац виражовац – чи писмено, чи усмено, потим ту предмети о друкованим, радийским, телевизийним, интернет новинарстве. Мали зме и предмети за хтори зме часто думали же нє маю вязи зоз новинарством, алє понеже гваря же ше новинар розуми до шицкого, а нї до чого пребарз, думам же кажди предмет бул хасновити.   

Цо шицко треба знац кед сцеш буц добри новинар?

Треба ше знац крашнє виражовац, знац як бешедовац зоз людзми, прето же то ключне у нашей роботи. Добри новинаре любопитлїви, любя виглєдовац, нє одрабяю нашвидко, алє ше наисце пошвеца тому на чим робя и вец робота добре поробена. 

Дзе новинар шицко може робиц?

Новинар може робиц у новинох, на радию, телевизиї – то традицийни медиї, алє окрем того новинаре робя и на порталох, а можу водзиц и подкасти и подобне.

Хтори питаня новинар вше муши поставиц?

Муши поставиц пейц основни питаня – Хто? Цо? Кеди? Дзе? Прецо?, а ту и шесте питанє Як? а одвити на тоти питаня нам даваю вистку.

Одвше ши сцела робиц праве тоту роботу?

Гоч ми тота професия вше випатрала интересантно, як мала сом нє задумовала же єдного дня будзем новинарка. Одвше сом любела и добре ми ишли язики, роздумовала сом о тим же бим любела студирац анґлийски язик. Предумала сом ше прето же сом нє сцела робиц у школи, а нє могла сом задумац цо бим друге робела зоз язиком. Интересованє за новинарство ше зявело уж концом штреднєй школи и указало ше же то робота хтору любим и хтора ми добре идзе.

Як випатра твой роботни дзень?

Роботни дзень вше иншаки. Пондзелками маме схадзку редакциї на хторей ше радзиме цо будземе робиц того тижня. Часто ходзим знїмац даяке случованє, интервю, лєбо дацо треце та сом на терену, а єст днї кед робим у будинку телевизиї – теди ше найчастейше рихтам за монтажу, лєбо идзем до монтажи. Робота новинара ноши зоз собу и нєзвичайни роботни час, прето же ми робиме и кед други одпочиваю – идземе на терени и вечарами, през викенд, за швета як цо Крачун, 1. май.

Цо найкрасше у тей роботи?

Найкрасше же мам нагоду вше научиц дацо нове, упознац нових людзох. Любим кед направим даяки прилог за хтори людзе поведза же ше им пачел, лєбо же бул хасновити.

А цо найчежше?

Найчежше кед мушим поробиц прилог и задумам як будзе випатрац и зоз ким будзем бешедовац, а людзе нє жадаю дац вияву.

Чи твоя робота помага другим и як?

Новинаре маю улогу информовац явносц о тим цо ше случує у дружтве. Даваме можлївосц же би обични людзе явно гварели яки проблеми маю и глєдаме одвити на питаня прецо ше дацо случело, лєбо як мож ришиц тот проблем. Кед ше орґанизує даяку гуманитарну акцию, ми то идземе знїмац и на таки способ шириме приповедку о тим же би информация дошла до цо вецей людзох, цо тиж файта помоци.

Яка особа треба же би була же би була добри новинар?

Треба же би була шмела, любопитлїва, отворена, же би мала свойо становиска, алє и почитовала цудзи. Треба же би знала крашнє бешедовац, алє и же би знала слухац.

Мушиш ношиц даяки окремни шмати на роботу?

У нас ше кажде облєка у своїм стилу, єст колеґинї хтори, наприклад, ноша и запетки, алє векшина ше облєкаме опущено – фармерки, блузни, патики, лєбо ципели. Даєдни ситуациї, як цо то, наприклад, знїманє емисиї у студию вимага же бизме облєкли елеґантни шмати, док на знїманє турниру у фодбалу мож пойсц и у тренерки.

Маш трему пред камеру?

Кед знїмаме емисию на терену и розгварки вец нє мам, а у студию ми випатра же бим мала барз вельку трему, та сом ше прето анї нє опробовала у улоги спикера.  

Цо биш поручела дзецом хтори сцу постац новинаре док вирошню?

Поручела бим им же то барз красна професия, алє є заш лєм нє за каждого. Кед любице динамику и нє мушице мац даяку рутину, а ґу тому сце и любопитлїви, креативни, любице бешедовац, а ище баржей слухац, вец то права професия за вас.