21. ЯНУАР – На нєшкайши дзень у Шидзе народзена учителька и културно-просвитни роботнїк Вира Гудак.
1861 – Народзел ше скулптор и академик СAНУ Дьордє Йованович (Нови Сад, 21. януар 1861 – Беоґрад, 23. марец 1953), бул єден з сновательох Уметнїцкей школи, з хторей познєйше настала Уметнїцка академия.
1905 – Народзел ше модни креатор Кристиян Диор (Ґрандвил, Французка, 21. януар 1905 – Монтекатини Терме, Италия, 23. октобер 1957), бул єден з найвекших модних диктаторох у швеце после другей шветовей войни.
1911 – У Монте Карлу отримане перше авто-рели обегованє.
1927 – Народзела ше Вира Гудак, нар. Бесерминї (Шид, 21. януара 1927 – Петроварадин, 28. юлий 2011), учителька и културно-просвитни роботнїк. Вира Гудак закончела основну школу у Шидзе, а нїзшу ґимназию у Дервенти, учительску школу у Сараєве и у Осиєку. Робела як учителька у Петровцох, а од 1972. року у Новим Садзе. У КПД Яким Гарди у Петровцох була длугорочни секретар и руководителька театралней и танєчней секциї. Зоз приходом до Нового Саду, робела як учителька руского мацеринского язика у основних школох. Анимовала дзеци до секцийох у КУД Максим Горки, и иницирала формованє оркестра. Зоз фолклорнима секциями поставела вецей танци, а зоз дзецинску театралну секцию режирала театрални фалати и драмски слички. Робела и зоз Дзецинску секцию Новосадскей сцени АРТ Дядя. Сотрудзовала и зоз Драмску програму Радио Нового Саду. Учителька Вира Гудакова жила зоз фамелию у Петроварадинє, дзе и умарла.
1942 – Почала Новосадска рация у Другей шветовей войни, кед мадярске войско зоз вигварку же слово о рациї же би одкрили скритих партизанох ликвидирало, по розположивих податкох коло 3800 цивилох: хлопох, жени, дзеци и старих, а по нєподполних податкох було найвецей Сербох и Єврейох, алє и Мадярох, Руснацох и Русиянцох… Комеморация ше у Новим Садзе отримує каждого року на дзень кед почала „рация” у Новим Садзе, на Кею жертвом рациї при памятнїку Фамелия, хтори виробел скулптор Йован Солдатович (1920–2005), а поставени 1971. року.
1954 – ЗАД зачирели першу подморнїцу на атомски погон – Наутилус.
