22. ЯНУАР – На нєшкайши дзень ше народзели: Ириней Тимко, Любомир Рамач Киме и Янко Гудак.
1788 – Народзел ше анґлийски поета Джордж Ґордон Байрон (Лондон, 22. януар 1788 – Мисолонґи, 19. април 1824), єден зоз сновательох европского романтизма.
1878 – Народзел ше академски скулптор, универзитетски професор Тома Росандич (Сплит, 22. януар 1878 – Сплит, 1. марец 1958), бул єден з сновательох и перши ректор Уметнїцкей академиї у Беоґрадзе.
1896 – Народзел ше маляр Сава Шуманович (Винковци, 22. януар 1896 – Горватска Митровица, 30. авґуст 1942). Намальовал пейц малюнки на хторих му инспирация були дзивки Рускинї хтори робели у його обисцу. У Ґалериї и нам позната його слика Рускиня у народним облєчиве (1935).
1902 – Ксения Анастасиєвич постала перша жена у Сербиї хтора здобула титулу доктора наукох.
1908 – Народзел ше теорийни физичар Лєв Давидович Ландау (Баку, Азербейджан, 22. януар 1908 – Москва, 1. април 1968), добитнїк Нобеловей награди за физику 1962. року.
1913 – Народзел ше хорски дириґент и композитор, музични сотруднїк Ириней Тимкo (Коцур, 22. януар 1913 – Нови Сад, 8. септембер 1987). Робел як инспициєнт Опери Сербского народного театра у Новим Садзе, у новосадским КУД Максим Горки Ириней Тимко основал мишани хор, а од 1969. року бул на длужносци редактора рускей народней музики у Радио Новим Садзе. Поховани є на Новим теметове у Новим Садзе.
1941 – Народзел ше новинар и публицист Любомир Рамач (Дюрдьов, 22. януар 1941 – Нови Сад, 29. април 2005), бул директор и на вецей заводи главни и одвичательни редактор новинох Руске слово. Основну школу Любомир Рамач закончел у Дюрдьове а Стредню економску школу у Новим Садзе, Економски факултет у Суботици, а од 1. авґуста 1966. року почал робиц як новинар у НВУ Руске слово. У новинох бул вонкашнї сотруднїк, потим новинар-сотруднїк, новинар-редактор политичней рубрики, заменїк главного и одвичательного редактора, вец главни и одвичательни редактор на вецей заводи (1974–1983, 1987–1993. и 2000–2005) и директор (1979–1987). До пензиї пошол 31. марца 2005. року. Любомир Рамач умар 29. априла 2005. року у Новим Садзе, поховани є у Дюрдьове.
1942 – Народзел ше дипломовани инженєр польопривреди и вецейрочни ґлумец-аматер Янко Гудак (Руски Керестур, 22. януар 1942 – Руски Керестур, 28. марец 2020).
