КОЦУР – У парохиялним Каритасу „Марийов дом” у Коцуре штварток пополадню, 5. фебруара, отримане друженє наволане Каритасово пратки котре уж прешло до традициї.
Госцох на Каритасових праткох зоз пригоднима словами привитал координатор коцурского Каритасу Янко Салонтаї, и здогаднул на значносц щирих и нєпоштредних друженьох, яки ше у прешлих часох часто запровадзовало.
Каритасово волонтере и того року були вредни и за тото праткованє пририхтали богати столи зоз сланима и сладкима лакотками. У їх числених кухарских специялитетох уживали шицки присутни, а Салонтаї их окреме похвалєл.
Окрем активистох и волонтерох коцурского Каритасу, на друженю присуствовали и старши парохиянє коцурскей парохиї, о. Ярослав Варґа зоз Руского Керестура, члени Церковного одбору Грекокатолїцкей церкви Успения Пресвятей Богородици, як и госци зоз парохийного Каритасу св. о. Миколая зоз Руского Керестура.
Каритасово пратки зоз музику и шпиванку прикрашели оркестер Полни погар (Пуна чаша) и Михайло Будински, а госци и домашнї ше розвешелєли и затанцовали, и тото праткованє препровадзели у красней атмосфери и друженю.
