14. ФЕБРУАР – Нєшка винїцаре славя святого Трифуна, а млади Дзень залюбених.
1835 – У Князовини Сербиї усвоєни Стритенски устав, перши устав у модерней сербскей историї. Написал го секретар княза Милоша Обреновича Димитриє Давидович, а на прикладох французкого и белґийского уставу. Княз Милош Обренович устав утаргнул уж у марцу.
1835 – Под назву Князовско-сербски театер у Краґуєвцу, на инициятиву Йоакима Вуїча и зоз пенєжну помоцу княза Милоша Обреновича, основани перши театер у Сербиї.
1914 – Народзени учитель, новинар, писатель и дружтвени роботнїк Йовґен Планчак (Руски Керестур, 14. фебруар 1914 – Суботица, 16. фебруар 1977). Основну школу Йовґен Планчак закончел у Руским Керестуре, до Учительскей школи ходзел у Зомборе и закончел ю у Пакрацу. Потим бул учитель у Руским Керестуре. У новинох Руске слово од перших числох 1945. року бул автор гумористично-сатиричней колумни Дїдо Скубан зоз Ґаравцу полни 22 роки. Йовґен Планчак бул од 1949. року управитель школи у Руским Керестуре. Преселєл ше жиц до Суботици и єден час робел як учитель у Новим Орахове и у Суботици. Йовґен Планчак умар 16. фебруара 1977. року у Суботици дзе є и поховани.
1928 – Народзени епископ Йоаким Гербут (Руски Керестур, 14. фебруар 1928 – Скоплє, 16. април 2005), бул владика скопски за римокатолїкох и апостолски визитатор за католїкох восточного обряду у Македониї. Основну школу закончел у Керестуре, а до ґимназиї ходзел у Болу на Брачу, Ужгородзе, Новим Садзе и Вербаше. Богословию закончел у Заґребе, за паноца є пошвецени 1952. року. Докторски студиї церковного права закончел 1966. року у Риме. За владику бул пошвецени 1970. року у Сараєве. Владика Йоаким Гербут умар 15. априла у Скоплю, поховани є 18. априла 2005. року у крипти Катедралней церкви св. о. Миколая у Руским Керестуре.
1961 – Народзени Дюра Будински (Руски Керестур, 14. фебруара 1961 – Нови Сад, 20. януар 2025). Основну школи Михайло Пупин закончел у Ветернику, и предлужел школованє як кларинетиста у Стреднєй музичней школи Исидор Баїч у Новим Садзе, потим у класи професора Николи Срдича на департману музичних уметносцох на Академиї уметносцох у Новим Садзе закончел студиї кларинета. Робел як музични редактор у Радио-телевизиї Войводини од 1988. року у редакциї забавней музики. Бул винїмкови мулти-инструменталиста, композитор, аранжер и познаватель шицких музичних стилох и напрямох. Дюра Будински поховани 24. януара 2025. року на Городским теметове у Новим Садзе.
1966 – Народзени поета, прозни писатель и литературни критичар Звонимир Няради (Руски Керестур, 14. фебруар 1966 – Руски Керестур, 15. април 1993). По законченей ґимназиї у Руским Керестуре Няради студирал руски язик и литературу на Новосадским универзитету. Обявйовал свойо твори у Литературним слове, часописох МАК, Шветлосц, Поля. Звонимир Няради обявел два збирки поезиї, а як литературни критичар анализовал сучасну руску поезию и творчосц младшей ґенерациї.
Сербска православна церква нєшка слави святого Трифуна, велькомученїка котри настрадал за християнску виру, и трима ше жє є защитнїк винїцох, шацох, щирей любови християнох, алє и защитнїк рижних ремеслох. З нагоди швета святого Трифуна нєшка ше символично орезую винїци и пошвецаю з вином зоз чим ше означує нова сезона и модлї ше же би рок бул плодни.
Заходни церкви означую святого Валентина або Дзень залюбених. Святи Валентин бул християнски мученїк котри жил у трецим вику и страдал за Христову виру. Од 15. вику ше го почало повязовац зоз Дньом залюбених прето же, як ше вери, винчал воякох цо тедишнї римски цар Клаудио Други строго бранєл.
Нєшка и Шветови дзень очуваня енерґиї (World Energy Day).