НОВЕ ОРАХОВО – Всоботу, 6. юния школяре зоз 12 ґенерацийох хтори учела учителька Леона Малацко порихтали нєзвичане здогадованє на свойо школованє по руски зоз тоту ораховску учительку.
На инициятиву Меланиї Шпрох Савич Ораховчанки, хтора жиє у Зенти, орґанизоване тото нєзвичайне стретнуце хторе почало зоз одходом по учительку Малацкову дому, а пред Домом култури ю чекали 40 школяре зоз червенима ружами, а гудаци грали єй любену писню Ружи, червени ружи.
Стретнуце учительки и єй дакедишнїх школярох виволало жалосни и радосни емоциї хтора у руских оддзелєньох робела од школского 1965/66. по 1977/78. рок. У шицких тих ґенерацийох мала вєдно 66 руских школярох од хторих на стретнуце пришли 40, а 6 покойним школяром на тот завод, до нєба пущени били балони. На тото друженє пришли бувши школяре хтори нєшка жию у Австриї, Мадярскей, Нємецкей, варошох коло Орахова, з Руского Кересура.
Учителька Леона Малацко по походзеню зоз Старого Вербасу, до Зомбора ходзела до учительскей школи, одала ше за Томислава Малацку зоз Орахова и там жиє и нєшка.
Друженє зоз учительку Малацкову у Доме култури у Новим Орахове почало зоз годзину на хторей преволани шицки 66 єй руски школяре, а вец зоз руску музику друженє тирвало до позно вноци.
