НОВИ САД – Внедзелю, 7. юния после пополадньовей Служби Божей, хтору служел о. Владимир Седлак зоз Петровцох, на 18:30 священїк Седлак отримал и преподаванє на тему Церква и штучна интелиґенция, з огляднуцом на енциклику Папи Лєва XIV Magnifica Humanitas.
Новосадски парох о. Дарко Рац привитал священїка Владимира Седлака зоз Петровцох и представел го парохияном хтори у красним чишлє пришли вислухац преподаванє.
Енциклику Папи Лєва XIV Magnifica Humanitas, хтора би у прекладзе значела велїчезне чловечество и одноши ше на становиско Церкви ґу штучней интелиґенциї и сучасней технолоґиї. И праве папа толкує и спозорює у енциклики же би штучну интелиґенцию требало хасновац осторожно и огранїчено.
На преподаваню о Владимир Седлак розложел и на прикладох толковал цалосци зоз паповей енциклики: Защита людзох од штучней интелиґенциї, Етичне хаснованє нових технолоґийох, Диялоґ зоз технолоґийнима компаниями и Очуванє людского достоїнства.
Потолковал же штучна интелиґенция то цошка актуалне и сучасне и хаснуєме ю каждодньово, хаснуєме интерней, диґиталну технїку, мобилни телефони… Прето о. Седлак гвари же жадал пренєсц главну нїтку роздумованя Церкви же штучна интелиґенция хасновите орудиє, алє вона нїґда нє може заменїц индивидуу чловека, бо вон зоз свою нєсовершеносцу нє повторлїви и єдна є коцочка у мозаику чловечества. Штучна интелиґенция зоз своїм совершеним приступом може виволац кризу чловекового идентитету прето же чловек дума же є нє досц добри, швидки, же є нє совершени, алє анї нє муши буц. Прето штучна интелиґенция хасновита, алє нє може заменїц тото природне цо чловек у себе як єство ноши.
На преподаваню буле красне число людзох, заинтересованих за таки теми, та мали и питаня на хтори о. Седлак дзечнє одвитовал.
