У Грекокатолїцкей церкви у Новим Садзе паноцец Владимир Седлак, парох у Петровцох, нєдавно отримал преподаванє „Церква и штучна интелиґенция”, а у шветлу папского документа „Magnifica humanitas”, котри облапя тему штучней интелиґенциї. Як порядни хаснователь штучней интелиґенциї, и сам себе часто поставям питанє же дзе мира и гранїца хаснованя технолоґиї у нашим каждодньовим живоце и дзе тот хасен постава чкода.
Представнїк сом и ґенерациї котра памета час кед исновали чарно-били телевизори, а фиксни телефони були привилеґия, час без компютерох, мобилних телефонох и шицкого цо з нїма пришло, можем свидомо повесц же ше живот зоз тима технолоґийнима иновациями барз вельо пременєл. Технолоґия нам постала состойна часц живота.
Тераз, кед тота мала справа, мали крадош уваги, престала буц поштреднїк, алє почала з вами комуниковац, пришла нова пременка. Така же ше и глава Католїцкей церкви, папа Лєв XIV оглашел по тим питаню. Праве одлучел най му перши важни теолоґийни документ, енциклика, будзе пошвецени штучней интелиґенциї. Цикаве и прето же його „именяк” Лєв XIII 1891. року видал енциклику „Rerum novarum” котра ше одношела на индустрийну револуцию. Исти дзень, 15. мая, алє 135 роки познєйше, папа Лєв XIV обявює „Magnifica humanitas” (Велїчезне чловечество) дзе оценює штучну интелиґенцию як нову индустрийну револуцию, застарани же би чловечески пренаходок нє бул злохасновани же би одберал роботни места и помалки превжал людске розсудзованє. Вон нє одруцує штучну интелиґенцию, алє ше заклада за строге етичне унапрямованє и дружтвене надпатранє. Источасно швет, окреме технолоґийно и економски розвитши жеми, зочує ше з „обратним Флиновим ефектом”.
Кед на початку 20. вику видумани штучни гной и почала його масовна продукция пред Першу шветову войну, вон принєсол нагли рост урожайох, роками потим, утвердзело ше же штучни гной одвичатељни за заґадзованє водох, вичерпує жем, и участвує у правеню ефектох склєняней загради.
И док рошнє число гевтих котри ше сцу врациц орґанскей поживи и природи, штучни гной и далєй єдине ришенє же би ше накармели милиярди людзе. Пред виком штучни гной бул револуционарне ришенє за триюмф над природнима огранїченями. Тераз ше зявела штучна интелиґенция котра би могла превозисц людски огранїченя. Питанє чи и з тим новим пренаходком, котри приноши ефикасносц, чловечество помалки траци свою людскосц и интелектуални схопносци.
Кажде вельке технолоґийне досцигнуце през историю перше ришовало проблем котри трапел людзох. Аж познєйше зме одкривали цо зме драгом жертвовали. А тераз у питаню чловек и розум. Кед же зме их уж, у комплету, нє дрилєли на драгу без врацаня.
Становиска висловени у тим тексту виключно авторово и нє вше одражую ушорйовацку политику новинох „Руске слово”.