Нєдавно на такволаней crowdfundingплатформи Добри дабарпорушана кампаня збераня донацийох за софинансованє 65. Фестивалу рускей култури „Червена ружа”. Поволанка з порученьом Най Ружа предлужи квитнуц унапрямена на поєдинцох лєбо орґанизациї, физични и правни особи, минимални винос донациї єдна червена – тисяч динари, а поставени циль назберац 250 тисячи динари. По заключенє тих новинох назберана була трецина тей суми, а док их достанєце читац, будзе ище цали єден тидзень кеди, же би ше и ви уключели до акциї потримовки найвекшому и найдлуговичнєйшому фестивалу рускей култури на тим просторе. На платформи Добри дабар детально обгрунтоване прецо порушана тота акция и за цо будзе похасновани пенєж, а у рубрики Информатор и на Рутенпресу можеце пренайсц линк и толкованє як дац донацию.
Акциї збераня финасийней потримовки на таки децентрализовани и дисперґовани способ нє новосц у нашей заєднїци (нажаль, чи на щесце). Ище з давен-давна преноша ше приповедки о тим як ше (само)финасовало дакедишнє РНПД. Як ше, потим, на мольбох будовало руски доми по наших валалох…
Остатнї рок-два, вецей здруженя – културни, спортски чи привредни, углавном з Руского Керестура, з власнима моцами и потримовку явносци, орґанизовали свойо подїї бо, пре висохнути инши и скорейши жридла финансованя, иншак нє могло. Нє так давно, и НВУ „Руске слово” прейґ истей платформи витворело успишни акциї за друкованє дзецинских кнїжкох Мойо перши слова, и найновшей, Шпациранє по вселени. Обидва кампанї удали ше и баржей як ше обчековало и наздавало. Медзитим, шицко спомнуте були єднократни, конкретни проєкти огранїченого обсягу и досягу.
Тераз, до „диґиталного дзвончка” збераме поєдинєчни и добродзечни донациї за отримованє манифестациї хтора по своєй сущносци централна подїя сезони, цалого року, кед слово о рускей култури, далєко превозиходзи локални валалски, лєбо аматерски танцуй-танцуй рамик и по обидвох осох залапя цалу руску заєднїцу.
Як ше поталь сцигло? Одвит, як и звичайно вецейнїсти и ма урядову, як и закулисну верзию. Алє, вокраци, сущносц же буджетски даваня за „Червену ружу” ровно исти (лєбо су аж и зменшани), док орґанизацийни трошки з рока на рок рошню. Тоту розлику тераз маме нагоду надополнїц ми сами.