И так… „Ружа”, и попри шицких виволаньох, жиє и будзе жиц. Дзека, ентузиязем, поготов при младих, вше векши и моцнєйши. Нє лєгко превозисц почежкосци зоз хторима ше стретаме, алє „Ружи” нє даме же би спрела!
Руснаци того року означа шейсц и пол децениї одкеди ше у Руским Керестуре отримує наш найстарши и наймасовнєйши Фестивал рускей култури „Червена ружа”.
Здогадуєм ше часох кед то бул фестивал Руснацох и Українцох, кед тирвал три днї, кед наступали КУД-и зоз шицких наших местох як и зоз других националних заєднїцох, госцовали професийни ансамбли з тедишнєй держави („Естрада братства”) и з иножемства… Простор опрез школи бул мали же би ше паркирали шицки превозки, а у школским дворе ше глєдало место вецей. Ґенерални спонзоре були Инвест–банка, Польопривредни комбинат „Перши май”, ДДОР осиґуранє и велї други, вечера за учашнїкох була у школскей єдальнї, у тедишнєй Мензи, у друженю зоз музику… Теди були таки часи и того ше можеме лєм з носталґию здогадовац.
У новшей историї були велї виволаня: як отримац 49. „Ружу” бо нарок пейдзешата, як орґанизовац єшеньску „Ружу” у Школско-спортскей гали, бо є у порядним термину одказана пре нєсподзивану шмерц Юлияна Рамача Чаму праве на дзень кед требала почац и шицко уж було порихтане, отримац 59. „Ружу” под окремнима мирами пре епидемию корона вирусу…
Гнєтка то були и чежки хвильки, рижни думаня и становиска, алє ше жило за „Ружу”, и под час єй отримованя, a и после, и вочи шлїдуюцей.
Найвекшу терху у орґанизoваню того Фестивалу ношели заняти у керестурским Доме култури, хтори и орґанизатор „Ружи”. Тераз то иншак. Ми, члени Орґанизацийного одбору и члени Програмского одбору ше стретаме през цали рок. Такой кед прейдзе „Ружа” маме евалуацию и анализованє, а вец ше уж одредзує датум за наиходзацу „Ружу”, розписує ше конкурс за нови композициї у забавним духу и за дзеци. Ентузиязем, нови идеї, нови змисти вше присутни и на таки способ ше креирує идуци Фестивал. Єст и виволаня хторим ше пробуєме прилагодзиц и проблеми хтори треба на позитивни способ ришиц.
Финансованє Фестивала з рока на рок – вше исте. Локална самоуправа, як снователь Дома култури Руски Керестур, покриє половку Фестивала, док Покраїна и Министерство култури даваю суму средствох хтори нєдостаточни же би ше „Ружа” отримала так як зме звикли. Правда, того року локална самоуправа, односно Општина Кула опредзелєла вецей средства, хтори достаточни дас за два трецини шицких трошкох Фестивала. Мушим надпомнуц же средства за тераз зменшани лєм зоз Националного совиту Руснацох, хтори вон дава прейґ Одбору за културу. З оглядом на тото же члени Одбору за културу нє правя розлику медзи манифестацию и фестивалом, „Ружи” дали исто тельо пенєжи кельо и другим нашим манифестацийом.
Прето мушим здогаднуц же „Ружа” найстарши и наймасовнєйши фестивал у нашей рускей заєднїци. Тот фестивал „розшева” нових шпивачох, нових композиторох, текстописательох, аранжерох…. На „Пупчу” ше шпиваю нови композициї за дзеци, на „Червеней ружи” нови шпиванки у забавним духу, млади шпиваче ше змагаю за найкрасши глас, наступаю числени аматере зоз шицких руских местох…
Того року зме порушали дониранє пенєжних средствох прейґ платформи „Добри дабар”. Жадаме же би и други участвовали и були часц „Ружи”. Приватни поднїмателє, установи, здруженя, институциї и поєдинци можу уплациц средства и то будзе їх доприношенє у форми спонзорства, донациї лєбо уходнїци.
Роками бешедуєме же би нови композициї хтори настали на „Ружи” требало зачувац на аудио знїмку, же би остали и емитовали ше на радию и телевизиї. Потераз, и попри добрей дзеки, то нє реализоване. Зоз своїма власнима моцами будземе ше намагац же бизме и тото ришели, праве зоз средствох хтори буду назберани прейґ платформи „Добри дабар”. То останє як резултат роботи шицких тих хтори на гоч яки способ участвую або участвовали у отримованю Фестивала през шицки тоти роки и тирваци шлїд сучасней творчосци у скарбнїци „Червеней ружи”.
И так… „Ружа” и попри шицких виволаньох жиє и будзе жиц. Дзека, ентузиязем, поготов при младих, вше векши и моцнєйша. Нє лєгко превозисц почежкосци зоз хторима ше стретаме, алє „Ружи” нє даме же би спрела!
Становиска висловени у тим тексту виключно авторово и нє вше одражую ушорйовацку политику новинох „Руске слово”.