ЖАБЕЛЬ – Представителє Општини Жабель, предсидатель Урош Раданович, заменїца предсидателя Милана Каназир и член општинскей ради задлужени за културу Зоран Пинїч уручели контракти представительом здруженьох и дружтвох зоз подручя Општини Жабель або тим котри дїлую у тей општини. Средства достали КУД „Тарас Шевченко” и Подобова колония „Стретнуце у Боднарова”.
По конкурсу за финасованє або/и суфинасованє програмох/проєктох у култури и уметносци у 2026 року предвидзене розподзелїц 4 милиони динари, а розподзелене 2 и пол милиони динари двацец здруженьом и дружтвом.
Док по явней поволанки за завичайни здруженя було предвидзене розподзелїц 800 тисячи динари, а додзелєне 600 тисячи динари штиром здруженьом на єднаки часци за розлични активносци.
По конкурсу за финасованє або/и суфинасованє програмох/проєктох у култури и уметносци у 2026 року средства достали и нашо два дружтва. Културно-уметнїцке дружтво „Тарас Шевченко” зоз Дюрдьова, за порядну дїялносц достало 400 тисячи динари, а Дружтво за руски язик, литературу и културу зоз шедзиском у Новим Садзе, за отримованє 22. Подобовей и 25. Дзецинскей колониї „Стретнуце у Боднарова” у Ґосподїнцох достало 150 тисячи динари.