ВЕРБАС – Мото стретнуце у орґанизациї домашнього вербаского Мото клубу „Парадизо”, того року осме, отримане у дньох викенду за нами, од 23. по 26. юлий.
Стретнуце отримане на теренох Центра за физичну културу „Драґо Йовович”, дзе були поставени камп, бини, як и числени рижни змисти котри орґанизаторе пририхтали. Байкерох було зоз шицких часцох нашей жеми, як и зоз жемох з окруженя, вецей як 250 мото клуби и байкерски екипи пришли потримац вербаских моторкашох.
Домашнї обезпечели безплатне єдзенє, рижни байкерски бависка и вредни награди за шицких присутних моторкашох. Як то уж и традиция на велїх мото стретнуцох, и у Вербаше вельке число моторкох участвовало и у дефилеу през город, цо була окремна подїя шицким котри их стретли.
И за тогорочне Мото стретнуце порихтани рижни интересантни змисти и добра музика, та так першого дня наступели „Ґимназиялци” и „Дионис”, другого дня присутних забавяли ґрупи „Ледене очи” и „Прляви инспектор Блажа и Клюнови”, a соботу вечар наступели ґрупи „Noćni putnici” и „Belo kopche”.
Вельке число Вербащаньох и людзох з околних местох, шицких ґенерацийох и возростох, нащивели спортски терени през тоти пар днї, а розишли ше полни красних упечаткох и з нєсцерпеньом чекаюци шлїдуюце мото стретнуце.