ЖАБЕЛЬ – Перша тогорочна трибина у орґанизациї Збору гражданох зоз Жаблю и студентох, под назву „Сербия або мафия” отримана вчера вечар, внєдзелю, 8. авґуста у центру Жабля.
Госци на трибини була др Драґана Дьордєвич, зоз Институту за хемию, технолоґию и металурґию на Универзитету у Беоґрадзе. Вона найвецей бешедовала о чуваню животного штредку у Републики Сербиї з огляднуцом на нєушорени сектор одпаду. Медзи иншим, др Дьордєвич гварела же у Сербиї єст вецей як пейц тисячи дзиви депониї, а пред три роки их було медзи два и три тисячи, цо значи же число дзивих депонийох у наглим и швидким росту понеже наша держава нє ушорела сектор одпаду, котри барз значни за здравє гражданох, алє є и значни ресурс за нови продукти з рециклованого материялу як и за нови роботни места.
Госц на трибини бул и еколоґийни активиста Миленко Карлица зоз Темерину котри найвецей бешедовал о фактох з терену, та гуторел же депониї, поготов у Жаблю и Темерину часто горя, алє и же инспекция нє окончує шицко цо єй задаток, а то, медзи иншим и писац кривични прияви за нєодвитуюце справованє зоз одпадом.
Розгварку водзел Синиша Лаушов, студент на Технолоґийним факултету зоз Нового Саду. Вон на концу подзековал гражданом же пришли послухац тоту значну трибину котра важна нє лєм жительом Жаблю, алє и цалей Сербиї, алє и на тим же присутни були любопитлїви, та ше вельо того випитовали.
Кус скорей як почала почала студентска трибина „Сербия або мафия”, у истим парку, на даскельо метери оддалєносци активисти Сербскей напредней странки розцагли три свойо штанди презентовали свию странку дзелєли рекламни материял и чоколадки.