19. АВҐУСТ – На нєшкайши дзень народзел ше ґлумец аматер Янко Рац.
1646 – Народзел ше астроном Джон Флемстид (Дарби, Анґлия, 19. авґуст 1646 – Берстоу, Сури, Анґлия, 31. децембер 1719), снователь обсерваториї у Ґриничу.
1871 – Народзел ше пилот и конструктор авионох Орвил Райт (Дейтон, ЗАД, 19. авґуст 1871 – Дейтон, ЗАД, 30. януар 1948), пионир авияциї.
1883 – Народзела ше модна креаторка Ґабриєла Бонур Коко Шанел (Сомир, Французка, 19. авґуст 1883 – Париз, 10 януар 1971), єдна з шветових модних диктаторох 20. вику, хтора скоро шейсц децениї суверено владала з високу паризку моду.
1902 – Народзел ше америцки писатель кратких гумористичних писньох Фредерик Оґден Неш (Нюйорк, ЗАД, 19. авґуст 1902 – Балтимор, ЗАД, 19. май 1971).
1942 – Народзел ше дипл. инж. польопривреди, длугорочни ґлумец аматер Янко Рац (Руски Керестур, 19. авґуст 1942 – Руски Керестур, 22. октобер 2021). Основну школу Янко Рац закончел у родним месце, а Стредню польопривредну у Футоґу, дипломовал на Польопривредним факултету у Новим Садзе 1967. року. Перше роботне место му було у ЗПЗ Русин у Руским Керестуре, вец робел у фабрики олєю Витал у Вербаше и потим по пензионованє робел у Польопривредним комбинату Перши май у Руским Керестуре. Зоз театралну дїялносцу ше почал занїмац ище як школяр у основней школи, при наставнїкови Юлинови Колєсарови, як член бабкарского театра, а вец бул стаємни член Керестурскей сцени АРТ Дядя. Од першей улоги Анучкина у Ґоґольовей Женїдби 1969. року Янко Рац на сцени бул у ище 35 театралних сезонох у вєдно 36 улогох, а остатня була у представи Национална стратеґия Славка Ороса 2014. року.
1960 – Совєтски сателит Спутнїк 5 лансирани до орбити коло Жеми, а у нїм були пси Белка и Стрелка.
Нєшка Шветови дзень гуманосци (World Humanitarian Day), лєбо Шветови дзень гуманитарних роботнїкох, запровадзели го Зєдинєни нациї як здогадованє на 19. авґуст 2003. року, кед у шедзиску ЗН у Баґдаду (Ирак) у бомбашским нападу погинули 22 гуманитарни роботнїки.
Нєшка шветови дзень фотоґрафиї (World Photography Day). Означує ше од 2010. року, як памятка на дзень кед представени поступок даґеротипиї у Паризкей Академиї наукох 1839. року.
