РУСКИ КЕРЕСТУР – За два днї Добродзечне огньогасне дружтво виходзело уж два раз на терен гашиц огень у обисцох котри спричинєсли нєисправни и нєадекватни електрични инсталациї.
Перши огень бул пондзелок, 17. авґуста, у обисцу на Ленїновей улїчки, кед ше вчас над раном запалєл предлужни шнур дзе була уключена райбачка. Як дознаваме, зоз швидку реакцию огньогасцох, у тим случаю огень спричинєл лєм минималну чкоду.
Ютредзень, 18. авґуста дополадня тиж бул ище єден огень найвироятнєйше пре подлєйши електрични, инсталациї и нащесце зопарти є на час.
Огньогасци и електричаре котри виходзели на терен, з тей нагоди апеловали на ширшу явносц же би осторожно поступали зоз електричнима апаратами, и же би ше притримовали препоручених обтерхованьох спрам капацитету инсталацийох.
Попри тим, огньогасци апелую на польопривреднїкох же би нє палєли сцернянки у хотаре, понеже того лєта уж даскельораз гашели и таки огнї.